आफ्नो सरकारका पालामा बनाएका योजना कार्यान्वयन गरेर अहिलेको सरकारले जस लिएको ओलीको भनाइ थियो।
ओलीको अभिव्यक्ति थियो ‘हामीले बनाएको योजना अनुसार भोली रेल गुड्छ, फेरि कुनचाहिँ नक्कली फादर हामीले रेल ल्यायौं भन्दै प्रचारमा उत्रिन्छ।’
शुक्रबार बालकोटस्थित ओली निवासमा पुगेका पिपुल्स क्याम्पसका नवनिर्वाचित विद्यार्थी नेतृत्वलाई शुभकामना दिने क्रममा अोलीले यस्तो बताएका हुन्।
अध्यक्ष ओलीले प्रधानमन्त्री पुष्पकमल दाहालले झापामा गएर दिएको अभिव्यक्तिको पनि खण्डन गरेका छन्। संविधान जारी गर्नका लागि ओली राजी नभएको जिकिर गर्दै प्रधानमन्त्री दाहालले आफूहरुले ओलीलाई राजी गराएको बताएका थिए। जवाफमा ओलीले संविधानमा माओवादीलाई आफूहरुले नै घिसारेर ल्याएको दावी गर्दै प्रधानमन्त्री दाहालको भनाईको खण्डन गरेका हुन्।